Festa de Fin de Curso 2026

O pasado 29 de Maio, a nosa comunidade educativa celebrou con gran ilusión a tradicional Festa de Fin de Curso, unha xornada de convivencia, alegría e agradecemento por todo o vivido ao longo deste ano académico.

A celebración deu comezo cunha emotiva eucaristía na que participaron alumnado, familias, profesorado e persoal do centro. Durante a celebración tivemos moi presente a figura da Nai Cándida, cuxo exemplo de fe, servizo e compromiso coa educación continúa inspirando a nosa misión educativa. Foi un momento especial para dar grazas polo curso compartido e para fortalecer os lazos que nos unen como comunidade.

Tras a eucaristía, o colexio encheuse de actividade e diversión. Os máis pequenos gozaron dunha ampla variedade de xogos e de inchables converténdose nos protagonistas dunha mañá chea de sorrisos e entusiasmo.  Ademais, durante a xornada celebrouse un mercadiño solidario, unha iniciativa que contou cunha gran acollida por parte das familias e da comunidade educativa. Neste espazo púidose adquirir unha ampla variedade de produtos, contribuíndo ao mesmo tempo a unha causa solidaria.

Ao longo do día, o alumnado participou en diferentes propostas lúdicas e actividades de convivencia que favoreceron o encontro entre compañeiros e familias. Pola tarde, a música e o baile tomaron protagonismo cun concurso de baile e unha animada discoteca, que fixo as delicias dos estudantes.

Desde o centro queremos agradecer a implicación de todas as persoas que fixeron posible esta celebración e que, unha vez máis, contribuíron a crear un ambiente de familia, participación e alegría, tan característico do noso proxecto educativo.